Ы.Алтынсарин атындағы дарынды
балаларға арналған

     2018 жылдың 2 наурыз күні мәжіліс  залында қоғамдағы ананың орнын түсіну әрі аналарды құрметтеу арқылы туған  жерге деген сүйіспеншілікті арттыру  мақсатында  Павлодар қаласындағы республикаға танымал «Нұр - Ана әлемі» қоғамдық бірлестігі мүшелерімен мектептің жоғары сынып қыздары  арасында  «Мейірімділікті  анадан  үйрен!» атты тәрбиелік‑танымдық сұхбат кеші өтті. Қатысқандар: 7,8,9,10‑сынып қыздары, ұстаздар мен  ата-аналар.

     Кешті жас маман Букурова Салтанат Болатовна мен 10-сынып оқушысы Гүлнар Жанболат жүргізді. Кездесу кешіне «Нұр - Ана  әлемі»  қоғамдық  бірлестігінің  жетекшісі  Максилова Бақытжамал  Шаханқызы мен Алпысбек  Нұр  Әлімғалықызы келді.

     «Қариясы бар үйдің, қазынасы бар» деп халқымыз айтқандай, рухани құндылықтарды насихаттап жүрген ардақты аналар кештің көркін кіргізіп, тақырыпты танымды толғаныстарымен талқылап, салиқалы ақыл-кеңестерін ортаға салды.

     Аяулы аналардың құрметіне «Айжан қыз» би тобының бишілерінің орындауында «Қазақ биі», жас толқын өнерлі оқушылардың орындауында әннен шашу шашылды.

     Осы іс-шараның өтуіне  5 "а"-сынып ата-аналарының да қосқан үлестері зор болды.

2018 жылдың 16 ақпан күні 7-сыныптар арасында «Спорт - сенің серігің»  тақырыбында  көңілді старт  эстафеталық жарысы өтті. 2018 жылғы қысқы олимпиададан бейнебаян көрсетілді.

Сайыс 5 кезеңнен өтті:

1- кезең:  «Эстафета таяқшамен жүгіру.

2- кезең: «Кім епті» /хоккей/.

3-кезең: «Тарақан жүрісі».

4-кезең: «Кедергілерден өтіп, тапсырмаларды орындау».

5-кезең: «Арқан тарту».

Нәтижесінде,  «Желаяқтар» командасы (7«а»-сынып) – І орын,  «Бірлік» командасы(7 «б»-сынып)  – ІІ орын, «Қыран» командасы (7 «ә»-сынып) -  ІІІ орынмен марапатталды.

2018 жылдың 15 ақпанында мектебімізде жасөспірімдердің қоғам және ата-ана алдындағы міндетін, жауапкершілігін кеңінен дәріптеу мақсатында «Құқық бұзушылық және жасөспірім» тақырыбында кездесу ұйымдастырылды. Кездесуге 6,7,8-сынып оқушылары қатысты. Мектеп инспекторы, полиция капитаны Қайрат Серікұлының оқушыларға арнайы әзірлеп әкелген ақпаратына мектеп оқушылары бірнеше сұрақтар қойып, кездесу кешінде белсенділік танытты.

Жауапты: 6«ә»-сынып жетекшісі Берсугурова А.А.

2017 жылдың 8 ақпанында 7-сыныптар арасында «Дарабоз»  танымдық сайысы өтті. Оқушыларды  туған жеріне, еліне деген сүйіспеншіліктерін арттыру, оқушылар бойына ұлттық мәдени құндылықтарды сіңіру мақсатында өткен сайысқа оқушылар белсене қатысты.  «Дарабоз» сайысы  V кезеңнен тұрды: 1-кезең: «Сәлем-сөздің атасы»; 2-кезең: «Кім, жылдам?»; 3-кезең: «Полиглот»; 4-кезең: «Сәйкестендіру»; 5-кезең: «Бәйге». Жарысқа қатысқан «Жасұлан», «Жасқыран», «Сұңқар» топтары өз құрамын таныстырып,  ұрандарын айтып, сайыс кезеңдерінде ерекше қызығушылық танытты.  

                                                                                                             Жауапты: тәрбиеші Таңсамалы Серікбаева

31 қаңтар күні  мектеп мәжіліс залында сағат 15.00-де «Адал ұрпақ» ұйымының ұйымдастыруымен «Рухани жаңғырудың жарқын жолы» тақырыбында 7-10-сыныптар арасында конференция өтті. Оқушыларға видеороликтер көрсетілді. Елбасымыз Н.Ә.Назарбаевтың «Тәуелсіздік дәуірі» атты жаңа кітабы таныстырылды. Тарих пәнінің мұғалімі Т.М.Сарсенов елбасымыздың жаңа туындысында егеменді мемлекетіміздің негізі қаланған күннен бастап оның қалыптасу кезеңдерінің ерекшеліктері мен 26 жылдық тәуелсіздік дәуіріндегі ішкі және сыртқы сын-қатерлерді еңсеруге байланысты қабылданған шешімдердің мән-мазмұны мен тетіктері жайлы жазылғанына егжей-тегжейлі шолу жасады. Сонымен қатар кітапта «қазақстандық даму үлгісінің» табиғаты мен оның эволюциясы, басты ұстанымдары мен қозғаушы күштері сараланғандығын әрі  Отанымыз Қазақстанды жаңғыртудың үш толқыны кеңінен ашып көрсетілгендігін атап өтті.

Жауапты: тәрбиеші Жамалиденова Гашура Шакитовна.

27 қаңтар күні мектебімізде Павлодар облысының 80 жылдық мерейтойына арналған «Менің мақтанышым – Павлодар», «Туған өлкеге тағзым», «Менің Павлодарым», «Туған өлкем», т.б. тақырыптарда 5-10-сыныптар арасында ауызша журнал, конференция, пікір алмасу, т.б. формаларда тәрбие сағаттары өткізілді. Оқушылар облысымыздың тарихымен танысып, тәуелсіз еліміздің тұғырын биіктетуде ерекше орын алатын аймақ екенін танып білді.

25 желтоқсан күні Павлодар облысының 80 жылдығына орай 5-сыныптар арасында «Көңілді старт» эстафеталық жарысы өтті. 
Сайыс 8 кезеңнен өтті: 1-кезең «Эстафета», 2-кезең «Аралас эстафета», 3-кезең «Бақа», 4-кезең «Пингвин», 5-кезең «Кедергілер», 6-кезең «Үлкен эстафета», 7-кезең «Ханталапай» /Команда капитандары жарысы/, 8-кезең «Арқан тартыс». 
Нәтижесінде «Жеңіс» командасы (5«ә») - «Жүзден - жүйрік», «Дарабоз» командасы (5«б»,«в») - «Күштілер мен батылдар» номинациясымен марапатталды. Жауапты: тәрбиеші Кенжебаева Д.К.

Қазақстан Республикасының Президенті Н. Назарбаевтың Қазақстан халқына Жолдауы. 2018 жылғы 10 қаңтар

Ұлт көшбасшысының жолдауы - болашаққа бағдар

    Біз, Павлодар қаласының Ы. Алтынсарин атындағы дарынды балаларға арналған облыстық қазақ гимназия-интернатының ұжымы, Мемлекет басшысы Нұрсұлтан Әбішұлы Назарбаевтың Қазақстан халқына арналған 2018 жылғы 9 қаңтардағы Жолдауын үлкен жігермен  қабылдадық.  Елбасымыз өз Жолдауында Қазақстанның жаңа жылдам өзгермелі әлемде өзіне лайықты орнын алу үшін жүзеге асырылуы тиіс 10 басты міндетті айқындап, көрсетті. Оның ішінде барлық жастағы азаматтарды қамтитын білім беру ісінде өзіміздің озық жүйемізді құруды жеделдету қажет екенін атап өтті. Егемендік алған тәуелсіз Қазақстанның әлемдік өркениетке жетудегі бірден-бір дара жолы – білім. Орта мектеп – білім жүйесінің ең басты буыны, мектепте қаланған білім негізі адамның болашағына жол ашады.

     Қазіргі жаңа технологиялардың қарқынды даму кезеңінде болашақ ұрпақтың тәрбиесі мен білім алуындағы ұстаздардың атқаратын рөлі ерекше. Егемен еліміздің болашағы, оның әлемдегі өз орны, ең алдымен білім мен тәрбиенің бастауы – ұстаз қолында. Білім алу сипаты алуан түрлі екенін ескерсек, заманауи білім беру жүйесінің мақсаты – бәсекеге қабілетті жан-жақты көп тіл білетін маман дайындау. Бүгінгі күні біз Назарбаев зияткерлік мектептерінде тәжірибеден өткен заманауи оқу бағдарламаларын негізге алған жаңартылған білім мазмұнына көшіп, халықаралық стандарттарға сай келетін жүйеге қадам бастадық. Бұл  біздің балаларымызға қажетті функционалдық сауаттылық пен сыни тұрғыдан танымдық әлеуетін дамытатын  болады. Осы орайда мемлекет басшысы мұғалім мәртебесін арттыру мақсатымен білім берудің жаңартылған мазмұнына көшкен ұстаздардың лауазымдық жалақысын 2018 жылдың 1 қаңтарынан бастап 30-50 пайызға көбейтуді тапсыруы қуантарлық жағдай. Оқытудың мазмұндылығы заманауи техникалық тұрғыдан қолдау көрсету арқылы үйлесімді түрде толықтыру, цифрлық білім беру ресурстарын дамыту, кең жолақты Интернетке қосу және мектебімізді заманауи ақпараттық құрылғылармен жабдықтау жұмыстарын жалғастыру арқылы біз оқушыларымыздың білімін халықаралық деңгейге көтеруге мүмкіншілік аламыз. Осындай қолдау қызметімізге шабыт беретіні анық. «Қазақстандықтардың болашағы – қазақ, орыс және ағылшын тілдерін еркін меңгеруінде» деп атап өтетін болсақ,  «Түркі тілінің ішіндегі ең гауһары – қазақ тілі» деп Мәшһүр бабамыз айтқандай, егер біз қазақ тілі ғұмырлы болсын десек, ана тіліміздің абыройын асқақтата жүріп,  түлектеріміз жаһандық әлемді тану үшін қажетті деңгейде үш тілді меңгеруі қажет.

     Елбасының биылғы жолдауы бұған дейінгі жасалған жалпыхалықтық реформалар мен дамыған елдердің қатарына жету бағытындағы «100 нақты қадам» Ұлт жоспарының жүзеге асырудың айқын тетіктері екенін түсіндіреді. «Ұлт көшбасшысының Жолдауында қамтылған адам капиталының жаңа сапасы – еліміздің бәсекеге қабілеттілігін қамтамасыз ететін нақты қадам», бағытына тоқталатын болсақ, «Болашаққа бағдар: рухани жаңғыру» мақаласын іске асыру барысында, ұлттық рухта тәрбиелеуде ауыл аймақтарынан келген дарынды оқушылардың бойына рухани ұлттық құндылықты дарытып, қазақи болмыста тәлім-тәрбие беруде ұстаздың еңбегі толассыз. Жаңа жағдайда жаңғыруға деген ішкі ұмтылыс – біздің дамуымыздың ең басты қағидасы, ел келешегіне үміт артады.

     Ы. Алтынсарин атындағы дарынды балаларға арналған облыстық қазақ гимназия-интернатының ұжымы

     «Желтоқсан – тәуелсіздіктің ұлы рухы» атты тақырыпта 5-11-сыныптар аралығында жаппай бір уақытта сынып сағаттары өткізілді. Мақсаты – еліміздің тәуелсіздігі жолындағы желтоқсан құрбандарының ерліктерін үлгі ету арқылы оқушыларды тәуелсіздікті бағалай білуге, құрметтеуге үйретіп, отансүйгіштік, патриоттық тәрбие беру; елордамыз Астана қаласының 20 жылдық мерейтойын құрметпен атап өту; оқушыларға еліміздің жүрегі – Астананы құрметтеуге баулу.

21 қарашада мектеп кітапханасында «Жас Ұлан» ұйымының ұйымдастыруымен «Зорлық-зомбылықсыз балалық шақ» тақырыбында тәрбие сағаты  өтті.  Тәрбие сағатына 5-8-сынып оқушылары белсенділік танытты. Оқушылар өз пікірлерін еркін жеткізе білді. Нәтижесінде  тақырып кеңінен талқыланды. Арнайы көрсетілген бейнероликтерді талдап, өз көзқарастарын білдірді. Әр топ бірлесе отырып, «Бейбітшіл ел - Қазақстан» моделін жасады. Жауапты: 7 «б»-сынып тәрбиешісі Мұсабекова А.К.